TUNI NEW ZEALAND GAMBUP LOCKDOWN NI (50) NI (LEVEL 2) NI (1) NI ZINGSANG BIAKPIAKNA AH THALAK KHOP DING
Migilo in ama gitlohna nusia hen la, thuman lo mi in ama ngaihsutna nusia hen. Amah in a hehpih theih nadingin Topa eite’ Pasian’ kiangah amah paisak un. Bang hang hiam cih leh a mawhna maisiangsak ding hi. ISAIAH 55:7
Thubulphuh : THUPHA SANTAAK HIHNA
“ZINGSANG PHA” ci-in na vekpi un ong hopih masa nuam ingh. Pasian in ih thungetna ong dawng in tuni level 2 nikhat ni kipan theita ihihman Topa’ tung ah lungdamna puak masa hang. Tu zingsang kikup ding kong teel thubulphuh ahihleh “Thupha santaak ih suah theihna ding in koici gamtat ding” cih tawm kikum nuam hang.
Thupha pen mi khempeuh in lunggulh ciat in, kideih ciat hi. Thupha ngahna dingin lampi tuamtuam tawh kihanciam hi. Thupha pen leitungah ih deihkim pen khat ahihzahkhat in zongh kizong ciat hi. Jacob bangin a Pa’ thupha ngahna dingin a nu tawh a pa khembawl in thupha na la uhhi (Pian. 27:1-30). Hih tungtawnin thupha ii manphatna leh a deihhuaina kilangsak mahmah hi.
1. Mikhempeuh tungah Pasian’ ong piakim thupha ( General Blessing):
Pasian in nisim in mi khempeuh tungah deidanna nei hetloin thupha ong pia den hi (Matt. 5: 45). Thu-um hita leh, hi kei taleh, mihing ih hihna tungtawnin Pasian in thupha hong pia veve hi, cih theih ding kisam hi. Ahizongh in hih thu a teel thei lo mi tampi a omna pen lamdang mahmah hi. Mi pawlkhatte in thupha bek deih in thupha piapa phawk lo uhhi. Mi pawlkhatte leuleu in thupha cih lah theilo (a ngah uh thupha pen kaam phatna hang (lucky) cita zen uh in a pia pa theilo kaanlai hi. Bangzah in dahhuai ahiam?
2. Thupha ngahna dingin thupha ngahtaak mi ihih ding kisam hi.
Jacob Stam ii thungetna khat in, “Topa aw… hih nate khempeuh hangin kote thupha hong pia in. Ahizongin hehpihna tawh kote thupha santaak mi hong hisak in,” ci-in a thungen hi.
3. Thupha santaak mi hihna cih pen leitung’ mawhna leh khialhnate nusia in Pasian’ sungah nuntak denna ahihi.
Tua bang hihna in Pasian leh ei hong kizomsak tawntung hi. Gentehna in Ruth thubu sunga Naomi in Pasian’ ciamsa gam sungah a om hangin ama’lungsim sungah Pasian mun pialo ahihmanin thupha ngahlo hi. A lungsim Pasian a piaklohna in thupha saantaak mi ahihlohna thu bulpi ahi hi. Bangzahta in mawhnei mi ihizongin, khialhna ihbawl khaphial zongin, Pasian kiangah kisikna lungsim takpi tawh ciahkik in, Ama’tungah bucing ki-ap theihna in Pasian’ maipha muhna le thupha ngahna ding lampi ahi hi (Isa. 55:7). Paunak in, “A khialhna a im mite a dau pailo ding a, a mawhna pulakin a kikhel mite in hehpihna ngah ding uh hi (28:13),” ci-in hong hilh hi.
4. Thupha santaak mi hihna dingin in ih sungtawng leh ih nuntakna kikhel ngiat ding kisam hi.
Tua bang ih hih leh mi khempeuhte’ sang thupha tuamtuam te ngah zaw in a lianzaw, a cihtaak zaw, a lungkimhuai zaw thuphate Topa in hong pia ding hi. Banghanghiam cih leh Pasian in, “a kitamzan leh a kisikkik lungsimte nial ngei lo,” ahihman hi (Late 51:17). 5. Midangte’ ngah thupha sangin a lianzaw leh akicingzaw thupha ih deih leh ei mahmah in thupha santaak mi ihih masak ding thupi ahihna ih gengen khin hi. Pasian’ thumanglo in, ama’ deihna pan pialkhia in, mawhna leh khialhna ih bawl den niloh leh ei pen thupha santaak mi kihilo ding hi.
Ih mawhna leh khialhnate Pasian kiangah thuumin thupha naak sungah lut ding kisam hi. Egypt gam nungngat sanin Canaan gamah mitsuan den ding kisam hi. Abraham leh Jacob bangin Pasian biakpiakna ah zuat kik ding kisam hi (Pian. 12:1-4; 35:1). A tawpna ah thupha ngahna dingin Pasian’ thumanglo pi-in thunget den ding sangin, Pa Pasian’ deihna sungah lungsim pumpi bucing ki-ap in ih om den leh thupha kicing takin ngah ding hizaw hi (Luka 15:17).
Topa’n thupha SANTAAK mi a hiding in laisim mimalkim tungah thupha ong pia tahen. Amen..