TUNI NEW ZEALAND GAMBUP LOCKDOWN NI (52) LEVEL 2 NI (3) NI ZINGSANG BIAKPIAKNA AH THALAK KHOP DING
Keima minin a kisam ka mite amau mahmah kiniamkhiatin, thu ngenin ka mai hong zong a, amau’ gitlohnate panin a kihei uhleh, keimah in vantung panin ka za ding a, amaute’ khialhna maisakin a leitang uh ka hoihsakkik ding hi. 2 KHANG TANGTHU 7:14
THUBULPHUH : THUPA LIMCI NGAH THEIH NA DING
Thupha deihlo kuamah ki-omlo hi. Thupha cih pen Pasian in mihingte tungah hong piak ama’ itna leh hehpihna pan a hong pai, muh theih vanlehna leh muhtheihloh na tampi hi a, mikim lunggulh leh deih bel te zongh ahihi. Thupha pen hoih mahmah napi’n ngah ding haksa mahmah hi. Ahizonghin Pasian in mi khempeuh tungah amau tawh kilawm kituak thupha na pia veve sam a, tua te pen ahuampi thupha (General blessings) kici hi (Matt. 5: 45). A huampi thupha sangin a limci zaw, a deihhuaizaw thupha omto lai hi.
Ei Christiante pen a huampi thupha bek tham loin a tuam vilvel (special blessings) thuphate zongh a ngah ngiat dingin Pasian hong sapte ihihi (Heb. 6:14; Matt. 25:34). Ahizonghin Christian hihna bek tawh Topa’ thupha ngah ding hilo a, a kisam zuih ding leh gamtatzia ding thu om lai ahihna Laisiangtho sungah kimu thei hi.
Tuate in;
1. Abel bangin a liimci pente tawh biakpiakna pia ni (Pian. 4:4)
2. Abraham bangin Pasian tungah upna nei ni (Pian. 15:6)
3. Danial bangin thunget thahat ni (Dan. 6:10)
4. David bangin Pasian phatphat ni (Late 34:1)
5. Elijah bangin lungkia kei ni (2 Kum. 2:1-10)
6. Enok bangin Pasian tawh tonkhawm den ni (Pian. 5:24)
7. Esther bangin minam ading nasem ciat ni (Est. 4:15)
8. Isaiah bangin Pasian’ thu um inla zui in (Isa. 20:2)
9. Jeremiah bangin khamangthangte ading vei kap ni (Jer. 3:48-52)
10. Job bangin ze-etna thuakzo ni (Job 5:11)
11. Joseph bangin mawhna pel ni (Pian. 39:12)
12. Joshua bangin hangsan ni (Josh. 1:7)
13. Moses bangin minam adingin thungen tawntung ni (Pai. 33:12-17)
14. Paul bangin a piangthak nuntakna nei ni (Sawl 22:8-10)
15. Ruth bangin teeknu (nulepa) it theih sawm ni (Ruth 1:16-18)
16. Solomon bangin Pasian kiangah pilna ngen tek ni (1 Kum. 3:5-9).
Tuabang in gamtat takpi ihihleh, Topa’n ih nuntakna ah thupha limci te hong pia taktak ding hi. Topa in a mite thupha limci-te a piak ding ciang in mawk piak het loin a kisam gamtatna leh zuihna kal hamtang hi (2 Khang. 7:14). Mi kim tunga Pasian piak thupha mawkmawkte hi loin thupha limci mahmahte a ngah kim dingin Topa in thupha hong pia kim tahen. Amen.