TUNI NEW ZEALAND GAMBUP LOCKDOWN NI (49) NI ZINGSANG BIAKPIAKNA AH THALAK KHOP DING
Korin Masa 13:5 “Itna neite a kilawmlo in gamtalo, heh pakpaklo, mite mawhna ciamtehlo hi.
“Kolose 3:13 Note lakah khat leh khat a kilungkimlo na om uh ciangin khat leh khat na mawhna uh kimaisakin na kihuh ciat un. Topa in note mawhna hong maisak bangin note zong khat leh khat na mawhna uh na kimaisak ding uh hi.
Thubulphuh : CIAMTEH NAWN KEI IN
Hih atung a thu tawh kizui in ih nisim nuntakna ah amangngilh huai leh a ciapteh huailo thu te ciamteh nawnlo in mangngilh zawh ding thu pawlkhat gen nuam hang.
1.Mi na huhna te ciamteh kei in:
Sum le paái, tha leh ngal,neihsa tawh mite huh in na panpih nate laibu tawh ahizongh in na lungsim sung ah ahizongh in ciamteh kei in. Banghanghiam cih leh ciamteh lecin nahuhsa mite’n hong thukkik kei leh khasia in, samsia kha ding hiteh.Na huhna atam zongh in manngilh sawm pahpah in.Thupha ding in koih lel in.
2.Na hehna, na khasiatna te ciamteh kei in:
Mi tung aa na hehna,na khasiatna,na thangpaihna,hong kibawlsiatna,hong kisimmawhna,hong kilangbawlna khempeuh te na lungsim sung ahizongh in laibu ah ciamteh kei in.Banghanghiam cih le tua mite na muhsim in nahehna te hong so,hong phulkik ding aa,nang gim leltak hiteh.A hoihlo te kemnawn kei inla, nusia,paaikhia pahpah in.
3.Hong bawlsia mite ciamteh kei in:
Ih neutung pan kipan lawm le gual bawlsiatna hita le mite bawlsiatna athuaklo kuamah om in ka um kei hi. Bawlsiatna ih thuakna te in thuakzawh hatna hong nei sak aa,ei aading in kahlei hoih ahihi. Bawlsiatna te na lungsim sungah ciamteh kei in. Banghanghiam cih leh hong bawlsia te in awlmawh selo napi ei a ciamteh te kigim leltak hi.Tua ahihman in lungsim natna te manngilh sawm pahpah in.
4.Nuam nasakloh thute ciamteh kei in:
Na khualzinna,na paina,mi kiang na hawhna,na tuahkhak thu ahoihlo, nuam nasakloh te na lungsim ah ciamtehteh nawn kei in.A beisa thu hoihlo te in na lungsim hong zingsak in,hong thanemsak ding hi. A beisa aa nuam nasakloh thu te beisak inla,na mailam ding athak in kipan in,geelna hoih nei ta in.
5. Na zak thuhoihlo te ciamteh kei in:
Online tungpan hita le,kiim leh paam pan nazak thuhoihlo te,hong ki gensiatna te,hong ki suktuahna te na bilsung,na lungtang tungah ciamteh kei in. Mi hong kona,hong daisakna, hong ki gensiatna cih aa kipan thuhoihlo te ciamteh kei in. Nang gim leltak hiteh.Thuhoihlo te ciamtehteh lecin na thanem den ding aa,na lungkham leltak ding hi.
Tua ahihman in na zak thu te,na muh thu te khempeuh a hoihlo te ciamteh kei inla,nusia,mangngilh pahpah in.. Mangngilh tuak te amangngilhzo ding in Topa’n laisim mimaalkim tungah thupha ong pia tahen. Amen.