TUNI NEW ZEALAND GAMBUP LOCKDOWN NI (53) LEVEL 2 NI(4)NI ZINGSANG BIAKPIAKNA AH THALAK KHOP DING
Bangbang hitalehang, i tunna ciangciang panin mainawt ciat ni. FILIPPI 3:16
THUBULPHUH : MAINAWT CIAT NI
Leitungah nungtakna ihneih sung teng mai ihnawt den kisam a, Ih hat a, ih hat kei zongh in mai ih nawt den ding ahihi.
1. A kisam mainawtna:
Martin Luther King in, “Leng in, na len theih kei leh zongh taii in. Na taii theih kei leh paii in. Na pai theih kei lai leh bokvak lel in. A thupi pen in mai ih nawt ciat ding ahihi” ci hi. Hihi, man mahmah hi. Ih hihna ciangciang tawh ih kungzuan in ih tai ding kisam ahihi. Leitung pilna leh siamna lamah mainawt ihkisam mahmah hi. Zomite ih omomna-ah pilna siamna, neih leh lamh, sum le pai, leh Pasian thu-ah MIDANG TE ihbatzawh na ding in nakpitak in thasan in mai ih naht mahmah ding Bisam mahmah ding hi.
2. Mainawt nading a a kisamte:
Bul kipatna leh a tawpna : Mainawt nadingin ih kipatna mun leh ihtun nading mun ihtheih kisam hi. Ihkipatna thei-in, ihtun nading thei kei leng lampi zuih ding kitheilo ding hi. Paunak khat ah, “Bulpat hoih pen a kimkhat zawhsa bang hi” ci a, Laisiangtho in, “Thu khatpeuh a kipatna sangin a tawpna hoihzaw a (Thuhilhna. 7:8a) cihi. Tua ahihman in kipatna leh a tawpna pen a kikhen thei lo mainawt nadingin a kisam masa ahihi.
3. Mainawt nadingin a neu lua cih bang om lo:
Na lawhcin, na mainawt nading in nang tungah tha hong pia, hatna hong guan pen thuneu cik a na ngaihsut thu khatpeuhzongh na hi thei hi. Kum zalom 14 lai a Mongol kumpi minthang Tamerlane pen mainawt-a a lawhcinna hang pen akigenteh a galte lak pana a kibuksimna mun pan miksite’ hanciamna a muh hang hi leltak hi, kici hi.
4. Ngaihsutna maan nei in:
Ih nisim nuntakna ah ngaihsutna maanlo ih neihna hangin kimainawt theilo a, kilawhsam zel hi. Mi nih leh thum omkhopna ah ngaihsutzia a kibangloh hun om thei hi. Tua pen ih kisansiam ciat ding kisam hi. Makaite hatlohna thanemna khawng uh gensiatsiat sang in ngaihsutna maan tak tawh ngaihsutpih leng “E, ihmakaite hat kei in, eite in ih tawsawn kul hi” cih bang ngaihsutna ih neih ding kisam hi. Tua hilo a, “Ih makaite tuabang.. tua bang, inn hong veh kei, hong it kei, thu hong ngetsak kei..” ih cihcih leh ei mahmah zongh ih thanem thei ding hi.
A ngah ding bekbek, mite in hong sepsak ding bekbek a ngaihsutna ih neih pen Zomite in ih paihkhiat hun ta hi. Mite sang a pilzaw, mite thu a ngetsak, mite etteh dinga nungta, mite piak sanga tamzaw a pia ih hih theih nadingin ihsila lungsim hoihlo ihpaihkhiat hun hi. Koikoiah ih om zongh in, ih hihna bangbang tawh mainawt ciat ni.
5. Ki-ukzawhna nei ding:
Laisiangtho sungah ki-ukzawhna pen a kisapna thu muntampi ah na kigen a, …khuapi khat ukzawhna sangin eimah ki-ukzawhna hoihzaw (Pau. 16:32b), thutheihna pen pumpi ki-ukzawhna tawh behlap ding (2 Pet. 1:6) ahihna leh a manphatna gen hi.
Mi minthang, a mainawt, a lawhcingte pen ki-ukzawhna a neite ahi uhhi. Josef leh Daniel pen pumpi ki-UK zawh na a neilo mi hi leh dinmun sangpi tunglo ding uhhi. Tua ahihman in eite in zongh, mainawt a khangtoh ih sawm leh ih pumpi ki-ukzawh ding kisam hi.
6. Mainawt nading a khak theite
Gensiatna : Mainawt nading a khak lianpi khat pen kigensiatna ahihi. Ahihhangin mi lawhcing leh mi thupite pen gensiatna a thuakzote hi citciat uhhi. Mite in gensiatna pen bangci bangin ngaihsun uh hiam? En dih ni :
“Gensiatna na pelh nop leh bangmah sem kei inla, bangmah gen ngei kei in. Tua hi leh bangmah na hi kei ding hi” – E. M Foster.
“Mi’n ih hihlohnapi hong gensiat leh ih hihlohna hi lel hiven heh huai lo hi. Ih hihna hong kigensiat leh zong ihhihna hi lel hiven, heh tuan kei ni” – Rev. Dr. J.M Paupu
“Kua ten bangbang hong gen ta leh maitai takin sang inla, na maban lim takin sem in” – Mother Teresa “Gensiatna, kona, mawhsakna cihte pen mihai khempeuh in seem thei lel a, mihaite’ nasep hizaw hi” – Dale Carnegie
Tuni in na nuntakna ah nasepna na bawlna te ah kuakua in ong gensia phial mah taseleh, lungkialo in na mai lam anawtzo den ding in Topa’n thupha ong pia tahen. Amen.