Iran gam nitumna lam munpan aa Kurdish minam Behrouz Boochani pen Australia te in gunkuang tawh amau gam sung a lut sawm te man a khumcipna uh PNG a kici Papua New Guina gam huam Manus Island detention centre ah 2013 aa kipan a kikhum cip mi te lak pan a minthang penpen khat a hihi.
A minthangna thu pen, Manus tuikulh sung a ki khumcipna pan in a thuakna thu te phone message sung ah Persian lai in gelh in a pualam ah khak aa tua a lai gelh te pen manglai in Omid Tofighian a cih in letkhiat sak ban ah laibu in kibawl hi. A laibu thulu pen “No Friend But the Mountains” hi aa 2019 kum kipat lam in laigelhsiam te Australia te ii pahtawina te pan a thupi leh a zahtakhuai a hi Victorian Prize for Literature leh the Victorian Premier’s Prize for Nonfiction a cih pahtawina te ngah aa Behrouz zong minthang mahmah pah hi.
2019 November kha 14 ni in New Zealand gam Christchurch khuapi aa kibawl lailam kimuhkhopna ah thugen ding in Word Christchurch te ii geelsakna tungtawn in pai aa New Zealand gam sung ah khakhat om theihna visa tawh hong lut hi.
US ah teng theih ding phalna a ki pia khin Behrouz in New Zealand ah asylum ngen mai ding a hiam cih te mipi ciang ngeingai aa a deih tawh a deih lo tawh New Zealand ii news tuamtuam nakpi tak in genpipen khat in tu ni dong a ki nei khat a hi hi.
Behrouz in Wellington ah December kha ni 5 ni teh thugenna nei kik leuleu ding hi. NZ$15 tawh ticket ki lei thei hi. A thei beh nuam te in hi facebook event page ah ki en thei hi. https://www.facebook.com/events/814010515703242/